Jaka

Jaka
Jaka, saking Blanco
Klasifikasi ilmiah
Krajaan	Plantae
Divisi	Magnoliophyta
Kelas	Liliopsida
Bangsa	Arecales
Familia	Arecaceae
Marga	Arenga
Spésiés	A. pinnata
Adan Binomial
Arenga pinnata (Wurmb) Merr.
Sinonim
Arenga saccharifera Labill.

Jaka (Arenga pinnata, suku Arecaceae) wantah soroh palem sané pinih mawiguna sesampun nyuh manut ring segi ekonomi. Punyan jaka mentik ring sajebag India miwah Asia kelod-kangin.^[1] Punyan jaka madué makudang-kudang wastan minakadi enau utawi aren ring Basa Indonésia, nau, hanau, peluluk, biluluk, kabung, juk utawi ijuk (aneka wastan lokal ring Sumatra miwah Semenanjung Malaya); kawung, taren (Sd.); akol, akel, akere, inru, indu (basa-basa ring Sulawesi); moka, moke, tuwa, tuwak (ring Nusa Tenggara). Ring Basa Inggris jaka kawastanin sugar palm utawi Gomuti palm

Jaka wantah palem sané ageng, prasida mentik ngantos 20 m tegehnyané miwah madiameter ngantos 65 cm. Batang jaka sané wayah kawastanin uyung miwah ring maduurnyané kasaputin duk sané mawarné ireng. Duk inggih punika wantah bagian pelupuh don sané nylubungin batangnyane. Papah jaka kawastanin pugpug miwah pangkal papahné kawastanin blongkang. Ring blongkang punika wénten serat sané kawastanin unus.

Don jaka sané wayah mawarna gadang kawastanin ron miwah sané nguda sané mawarna petak kawastanin ambu. Pugpug jaka mrasida mentik ngantos 6-12m miwah lantang ronnyané 1,5m.

Bluluk utawi buah jaka bentuknyané bunder madiameter 4 cm^[2] miwah kulitnyané mawarna gadang, ring soang-soang buah madué tigang biji sané mawarna petak. Bluluk punika nénten dados kaajeng matah-matah seantukan mrasida ngranayang gatel.

1. ↑ Uhl, Natalie W. (1987). Genera Palmarum : a classification of palms based on the work of Harold E. Moore, Jr. Moore, Harold E. (Harold Emery), 1917-1980., Dransfield, John. Lawrence, Kan.: L.H. Bailey Hortorium. ISBN 0-935868-30-5. OCLC 15641317.
2. ↑ Steenis, CGGJ van. 1981. Flora, untuk sekolah di Indonésia. PT Pradnya Paramita, Jakarta. Hal. 139.